تبادل
لینک هوشمند
غزل ۱
اوزوک کیمی ایتیرمیشم قاشیمی
تاپانمیرام وفالی یولداشیمی
بولود قویور باشینی داغ چینینه
من قارا گون هارا قویوم باشیمی
ایسته میرم یاریم گوروب اینجی یه
گیزله دیرم گوزومده گوزیاشیمی
باشماق كیمین زیوار سیزام حیف اولا
تاپانمیرام دردیمه كفاشیمی
نقاش اولوب خیالینده چكیردیر
اول دوداغ ، سونرادا گوز ـ قاشیمی
رنگی قوتولدی بوشلادی طرحیمی
گورمه دیم اوندان سورا نقاشیمی
مسافر اولدوم حیف اولا تانیش یوخ
ایق دالیمدا پیشیره آشیمی
-------------------------------------------------------------------------------------------------------
غزل ۲
یئنه غمخانه كیمین دیر منه دونیا گئجه لر
سن كی یوخسان گؤره سن گؤزلری دریا گئجه لر
بیر قارانلیق كوچه دیر ، بیر باجادیر ، بیرده منم
كیم بیله ر دردیمیزی همشه، یلدا گئجه لر
گؤزلیم گؤزلرینی اولدوز ائله گؤزلریمه
بلكه اولسون یوخومون كابوسی ، رؤیا گئجه لر
سن گئدندن سورا بیر بوغضدی سالیب درده منی
گوزیاشیمدان ائله دیم دردی مداوا گئجه لر
اوره ك اولدی پارالی ، گؤزلریم اولدی یارالی
یارادا هریارایا ائتدی مدارا گئجه لر
من پلنگ لر كیمینیدیم آیین اون دورد گئجه سی
آیی اوخشاتدی سنه ائتدی تماشا گئجه لر
سئوگی نین معناسینی گئزمه اوره کلرده کی من
ائتمیشم صبحه قدر سئوگینی معنا گئجه لر
-------------------------------------------------------------------------------------------------------
غزل ۳
دونیا منیلن ایسته میر بئش كلمه خوش دانیشا
هر گون كی عمریمدن كئچیر بیر داشدی كی دئیر باشا
بیرجه منه دئسین بیری ، نیله میشم بو خلقه من
هر كیمسه یولدان كئچینیر منیلن ایستیر ساواشا
قوش كیمینم كی روزگار ، قاناتلاریمی باغلییب
عقیل دئیر قوی باشووی ، آمما اورك دئیر یاشا
نه وقته جاق یازیم یازی ، نه وقته جاق چالیم سازی
دنیزلی یم ، دنیزلی یم ، دا طاقتیم گلیب باشا
ایسته ییرم بیر قوش اولام ، قانات چالام هر طرفه
گئدم اوزاقلاردان ائدم گونلریمی بیر تاماشا
-------------------------------------------------------------------------------------------------------
غزل ۴
گوزلـرون آخ نه گوزلدیـر ، نه گوزل ، آی پاراسی
اوزی بیر دونیا بویاغ دیرگوزوون آغ ـ قـاراسی
بو نـه گوزیاشدی كی طوفانلی ائدیب گوزلرووی
جـانیمـا دوشسـون اگر گوزلـروون وار قاداسی
دامجـی دامجـی ییقیلیـر خیردا گوزه ، من نه دئیم
دنـیـزه بـنـزیـیــر آمـا ایـكـی كیپـریـك آراسی
ائلـه اولـدوز كیمـی گوزیـاشی یئره توكمه گوزل
ائلـه اولـدوزلارا دیـمـز گونـشـیـن گوشواراسی
آغلامـا ، بیـر بئلـه گوزیـاش ائله مه ، آرخایین اول
قویمارام سئل لره دوشسون گئنه ده ائل ساراسی
-------------------------------------------------------------------------------------------------------
یازیرام شعریمی من ایسته سه ، ایسته مه سه
آغلیار قانلی بولود یازدا آیدین گوروشه
گویه رر داغدا چمن ایسته سه ، ایسته مه سه
دئمیرم < سیز > آرامیز بوندان آرتیغ سوسون
دئیرم یاریما < سن > ایسته سه ، ایسته مه سه
اوچدو بیر گوش کیمی تک گله جک ، گلمیه جک ؟
سپیرم دام داشا دن ایسته سه ، ایسته مه سه
--------------------------------------------------------------------------------------------
ائله دولدی گوزومه آیریلیغین غم قانی
قورخورام آغلیام آخ قان گوتوره هر یانی
بئله باخما گوزومه خیردادی آمما دئمه لی
بیر بولاغ دیر کی اوزونده یئر ائدیب دریانی
ائله تئز تئز اوره ییم سینه ده چیرپیر دیه سن
ایسته ییر تیتره ده سینمده اورک دونیانی
یئر - گوی آغز آچدی دئدی گلمه موغانه ساری
خان چوپان آغلا کی سئللر آپاریب سارانی
نفس چکنده هارایلار بو غاز بوغاز بیچیلـــــــیر
سازاخ سازاخ اوراغین الــلرینـــــده یاز بیچیلیر
قفـــس قفـــــس یومولاندا قاناد اومود کســــیلــیر
قاناد قاناد کســــیلنده اومود؛ بوغـــازبیچیلیــــــر
بیتنده نــازلی باخیشلار اوخون گوزی گوتومور
یومور گوزون آچیر آغزین باخیشدا ناز بیچیلیر
منــــه اکینچیــلیگی بیلمیــره م کیم اورگتـــــدی
کی اودلی سوز اکیلیرسینه م اوسته ساز بیچیلیر
سینئخ اورکلــــره بیر کیمــسه اوز دولاندیرمیر
یـــاواش یــــاواش ائله بیل قبله دن ناماز بیچیلیر
گورنده ائلچینی قیــزلاردا آرزی پارچــــــالانیر
دوداخلاریندا به بعـــــــــلی جاهازجاهازبیچیلیر
بوغور یاناقلاریمی پارچا پارچا گوزده کی سئل
خانا دیــون سارانـــین ایــــنینه آراز بیــچیـــــلیر
ندن دی بویارالی فریـــــــــــــــادین اوجا بویونا
قاناد قواره سی چوخداندی کی چوخ آز بیچیــلیر
کوک سالسادا یاز منده چمن سیز قالا سن ســــیز
داغلار باش آچیب اوز گوزی چن سیز قالا سن سیز
گل کورپـــــه لری نازلا چـــــتین دیرآتا سیز لـــــیق
شعر آدلی بالام ظولـــــمدی من سیز قـالا سن ســـیز
سنسـیز لیگی اوتماق آجی سوزدور یئمگ اولمور
قوشلاردا گرک اولسه ده دن سیز قالا سن سیز
تک بیر باشا من نیلیه بـــیللم توت الیـــــمنن
نذر ائیله میشم باشدا بدن سیز قالا سن سیز
عشقه اولوم اولسون اوزونی وارلیقا بوکسه
سنسیزلیگه جان وئرسه کفن سیز قالا سن سیز
نه بیر یری واردیر نه ده یوردی ییه سیز دیر
دونیا نه روادیر کی وطن سیز قالا سن سیز
اولدوز یرینه داش سپه لر گویلره بیر بیر
فریادیم اگر بیر گئجه سن سیز قالا سن سیز
نه تئزیوباندون سن؟
نه تئز یوباندون آ نازلم نه تئز یوباندون سن؟
شیکسته کسمه بوغازلم نه تئزیوباندون سن؟
آغاجلارین نفسی؛چایلارین پیچلتی سسی
یاشئل قدملری یازلم نه تئز یوباندون سن؟
آذاندا دوم دوری نیتله گوزتیکیب ساعاتا
یوباندی گوزگی نامازلم نه تئز یوباندون سن؟
گوزومده مین سارا دویغوبوغولماقا تله سیر
هارای لی های لی آرازلم نه تئز یوباندون سن؟
غزل غزل قورودوم اوزایچیمده دینله منی
صدف لی سینه سی سازلم نه تئز یوباندون سن؟
گلیِِن مَقاملی ؛مُقام ادلی پرده نین بزه یی
بایات شیرازآوازلم نه تئز یوباندون سن؟
نه گئج تله سدی منیم فریادیم نه گئج دیندی
نه تئزداریخدون آ نازلم نه تئزیوباندون سن؟
نظرات شما عزیزان:
ورود
اعضا:
<-PollName->
خبرنامه وب سایت:
آمار
وب سایت: